| 好多香港人都有抹茶控，甜品控，特別係女仔。所以約女仔出街，除左食正餐之外，仲可以食下以抹茶為主題嘅甜品丫。今次小編 Alice就為大家介紹幾間抹茶甜品好食嘅地方啦~  抹茶老字號: 中村藤吉 1. 中村藤吉 Nakamura Tokichi 第一間係中村藤吉，未正式開張已經人人期待，相信大部分嘅你都有聽過。中村藤吉係1854年創立嘅的京都抹茶老字號 (哇~ 原來已然百幾年歷史) ，香港分店係佢地第一間海外分店，食材每日由京都直送到港，係最地道嘅京都風味!  京都風味 我諗好多人都知道，中村藤吉冇訂位服務嘅，佢地以派籌形式。啱啱開嘅時候唔朝早12點前排隊都冇機會食到。不過宜家熱潮略減，宜家排隊，慢則個零鐘，快則幾分鐘。絕對唔會好似以前咁，有可能失望而回。而且，攞左籌之後，scan個QR code就可以知道宜家叫到咩號碼，可以安心周圍行下。  外賣嘅甜品同抹茶商品 一入到店內就會聞到陣陣茶香，仲會見到一大個空間擺放住磨茶葉的容器，感覺好特別。另外有一邊係擺放一D外賣嘅甜品同抹茶商品，所以其實有坐位嘅地方大約只佔一半。 中村藤吉嘅地方好日式, 寬敞舒適, 樓底很高，非常有空間感。而且因為位於18樓，可以望到維港景色。如果夜晚8點左右黎，仲可以睇到幻彩詠香江。食甜品嘅地方黎講，簡直一絕。  最傳統嘅抹茶黎做嘅雪糕、蛋糕、蕨餅、冰等 坐低左之後，侍應就會為你送上一壺日本茶。呢個茶壺相當靚，就好似藝術品一樣。小心! 係鑄鐵茶壺黎架~ 好重架~ 呢度嘅抹茶甜品係用最傳統嘅抹茶黎做嘅雪糕、蛋糕、蕨餅、冰等。 中村藤吉嘅甜品，唔單只有抹茶味，仲有培茶味架。各有特色，而小編就比較鐘意培茶嘅茶香，感覺上比抹茶濃少少。除左甜品，呢度亦有主食，好似抹茶蕎麥麵咁，都係以綠茶為主題。可以食完主食再食甜品，或者淨食甜品都冇問題。 中村藤吉 Nakamura Tokichi 尖沙咀彌敦道100號The ONE 18樓 Tel: 2426 6111 星期一至日: 11:00-22:00 (最後點餐時間：21:15)  2. 京林屋 Kyo 第二間要介紹嘅係位於銅鑼灣希慎廣場嘅京林屋。京林屋喺香港嘅名氣冇中村藤吉咁大。小編亦係行街時咁啱見到，先知佢啱啱開張。雖然名氣冇中村藤吉咁大，但其實佢嘅歷史比中村藤吉更長。京林屋喺日本京都有二百幾年歷史，係著名嘅抹茶老店黎架。再講個秘密大家知，抹茶新地及焙茶嘅發源地就係京林屋啦~~佢原名係「林屋茶園」，香港分店係佢地第一間海外嘅分店。 應該因為名氣不大，排隊嘅情況冇中村藤吉咁嚴重，而且佢都係可以scan 張飛上既 QR code，上網睇叫號情況嘅。  | 京林屋地方冇中村藤吉咁大，座位亦較逼。佢地有兩個比較有空間感同私隱嘅卡座，呢兩個卡座係有半屏風，其他人見唔到你個樣架。另外仲有幾張細枱同一張大枱，如果多人嘅話，就要同其他人一齊坐呢張大枱啦。雖然店子面積唔大，但裝修亦非常日式，而且冇設時限，呢方面係比中村藤吉優勝嘅。而味道，小編就覺得不相伯仲。 提提大家，京林屋嘅甜品賣完就冇架啦，如果係為左某樣野食而黎嘅話就入座前問下先啦~ 京林屋 Kyo 銅鑼灣軒尼詩道500號希慎廣場6樓603-604號舖 Tel: 3580 1838 3. GUM "JENG!" X 御前上茶 御前上茶本身係台灣一間極高評價的抹茶雪糕專門店，比飲食潮牌GUM ” JENG”帶入香港。香港宜家已經有4間分店。4間其實大同小異，但總覺得旺角總店係最好食嘅。呢間以抹茶為主題嘅甜品屋同上面介紹個兩間好唔同。呢間唔係歷史悠久嘅傳統日本老舖，但佢地除左有傳統嘅抹茶聖代同抹茶waffle之外，仲有玩gimmick，玩創意嘅抹茶菠蘿油、抹茶燉蛋白、抹茶焦糖燉蛋同抹茶芝士撻等，啱晒我地呢D怕悶嘅香港人。  御前上茶本身係台灣一間極高評價的抹茶雪糕專門店 御前上茶啱啱開嘅時候真係要排幾耐隊，仲有出新產品巳嘅時候都係一樣。不過宜家一般黎講都唔會太多人，即使要排隊都唔洗排好耐嘅。上次小編雖然係星期六下晝去，但好好彩，唔洗排隊呀~ 雖然唔係日本傳統老舖，但店內佈置都幾和風，以木色為主，而且掛有一個個繪馬(日本神社入面比人寫上願望嘅木牌)，其中有D仲有藝人寫架~  抹茶聖代同抹茶waffle GUM "JENG!" X 御前上茶 旺角廣華街13號廣輝大廈地下4-5號舖 2448 6738 星期一至四：14:30-00:00 星期五至六：14:30-01:00 星期日：13:30-00:00 屯門屯門鄉事會路83號V City商場1樓13號舖 星期一至日: 12:00-22:00 尖沙咀梳士巴利道3號星光行2樓誠品書店L203-L204號舖 星期一至日: 10:00-22:00 銅鑼灣Fashion Walk加寧街8-10號地下2A號舖 3486 7307 4. 京都抹茶屋 呢間京都抹茶屋比較，味道可能略為遜色，亦冇乜服務可言。但勝在一定有位，唔洗排隊，同埋呢度嘅款式比較多。好似士多啤梨呀，朱古力咁。即使唔太鐘意抹茶同培茶，都可以有好多其他嘅選擇。   你睇下個MENU就知，選擇真係比上面介紹嘅3間多好多。而且呢個位置唔多人，整體店鋪空間大，座位濶落，店員亦唔會過黎打攪你，有足夠私人空間，而且可以坐好耐，慢慢傾計都得。 呢度落單係以自助形式嘅，你要自己去cashier落order，之就店員會將你嘅order送去比你架啦~  京都抹茶屋 尖沙咀彌敦道132號美麗華商場2樓2009A號舖 Tel: 2628 0590 星期日至四: 12:00-22:00 星期五至六: 12:00-23:00 將軍澳唐德街9號將軍澳中心一樓123號 Tel: 2628 0633 星期一至日:11:30-22:30 屯門屯門鄉事會路83號V City商場地下一田百貨G1-8號舖 Tel: 2628 0363 星期一至日: 11:30-22:30 Written by Alice |
|
Victoria Chan天蠍座 Scorpio 
Alice Tang處女座 Virgo 
Gilbert Tang山羊座 Capricorn |
